W. KHOTBAH PIDATO
1. Mulonyo muluik ka dibukak, samo diucap malah Allah, samo
dikekuik malah Nabi, Nabi Muhammad SAW, waris nan tidak bulieh hilang, dipakai juo salamonyo. Mulonyo sumue ka dikali, mulonyo rantiang ka disakah, layang malayang sambah tibo, timpo batimpo salam datang. Duduek basamo jo nan banyak, rundiangan tapacik di nan basamo, kato tapegang di nan tuo, nan tagueh bakeh bagantuang,
iyolah pangulu dalam nagari. 2. Makok manyambahkan sambah lah ambo diateh duo tigo parkaro,
ampek dan limo martabat, yakni martabat sambah nan ampek. Partamo sambah, kadue simpueh, katigo manyusun jari nan sapulueh, ka ampek manakuekan kapalo kaharibaan pangulu. Adapun pangulu itu bulieh limpah kamurahan dari Sultan Iskandar Mudo, jawueh nan bardaulat, ampie nan bersuatu, datang manjalang nagari ko. Seperti dalam payuang panji, marawa basa mambukakan pintu kebaikan, manutuik pintu kejahatan. Makok diateh, ateh mangkuto, dibawah tirai tabantang, rajo nan sadaulat, pangulu nan sa andiko, ibarat kayu gadang manangah koto, tampek batadueh kahujanan, bulieh balinduang kapanasan, naiek dari janjang, turun dari tanggo, lagi johari bijaksano, manih muluik bakato-kato, mamegang labuhan adat jo pusako,
timbangan cupak jo limbago. 3. Sungguehpun ka Sutan surang tampek ambo mawalikan buah
parsambahan, mak bakarapatanlah angku nan tuo-tuo, niniek jo mamak nan saundang, pucuek bulek jo urek tunggang, nan badeta panjang bakatuek, bayangan sisi dalam kulik. Panjangnyo tak dapek di ukue, lebanyo tak dapek dibidai, salilik lingkaran kaniang, ikek santuang jo kapalo, tiok katuek baundangundang, tiok liku aka manjala, dalam karuik budi marangkak, tabuek dipaham tiok lipek.
Lebanyo pandindiang kampuang, pandukuang anak kamanakan, amparan di rumah tanggo, paraok gonjong nan ampek, kapayuang panji di halaman, pandindiang Korong jo kampuang, syariat waris mandirikan, nan dilingkuang cupak adat, bulieh balinduang
kapanasan, tampek batadueh kahujanan. 4. Sungguehpun ka Sutan surang nan taimbau di awal kato nan
sapatah, nak sarapek papeknyo lah niniek jo mamak nan saundang jo undang turun tamurun. Pusako jawek bajawek, limbago sudah takambang, janjang pusako tanggo adat. Sifat handiko harum manis, langgam budiman jo arifin, tampek balinduang cadiek pandai. Sandi aman tiang salamat, hukum adil bungka piawai, medan alur taluek bicaro, lubuek aka rangkiangan budi. Deta banamo sari mego, baju angkatan prapatieh, serong bapilin jo ikek pinggang, sisik karih tanam tabukan, calak lubuek caro malako, ampang labueh balam ka inggok, pakaian caro Minangkabau, mukin nan ampek pulueh ampek, cadiek pandai malalukan, johari bijaksano, sulueh bendang camin taruih, palito
sidang jum'at, maikut surueh Rasulullah. 5. Awal dahulu kato bana, asal dahulu tampek tumbueh, tumbueh
sarupo nan bak nangko, halal di kato nan duo, kato amanah kito pacik, kato kulipah kito pakai, usang pusako ditarimo dari niniek Katumanggungan sarato Parpatieh Nan Sabatang, iyolah adat dengan syarak, layienyo karangan jo buatan, bathinnyo garak dari pado Allah, waris nan dari pado Nabi, kulipah nan dari pado rajo. Batitih nan sapanjang alue, baturuik nan sapanjang jalan, bapakai nan sapanjang nan biaso, tiok tumbueh makanan tiliek, tiok pakarjaan dengan sabab, hujan nan bamulo, panyakik nan berasal, angin nan bapuhun, kato nan bapangka. Berawal makok berakhir, bersabab makok manjadi, ba asa makok bamulo, adat nan dikatokan berasal limbago, hujan nan bapuhun. Samo bak bungka jo naraco, nak samo naiek ka timbangan, mancari putieh tahan sasah, mancari hitam tahan tapo, haluih nan tidak basisiek, putieh nan tidak bakotoran, hukum adil tahan bandiang, bana lah bulieh tahan sudi.
6. Makok badirilah lawuik nan sådidih, sampai ka' ombak nan badabue, itu kabasaran rajo kito. Sungai banamo sungai ameh, ikan batalue dalam batu, makok ditumbuehkan Allah Taala malah kiro-kironyo Datuek Katamanggungan duo jo Datuek Parpatieh Nan Sabatang, urang nan cadiek kaduonyo, lagi johari bijaksano, manih muluik bakatokato. Pado malam inyo bapikie, dapek pikiran maso nartun, makok manikam batu malah dengan karih, karih banamo cumadak intan, karih bakaluek patah tigo. Sakarek ka Banuhurum, sakarek ka Bandur Cino, sakarek tingga dialam pulau paco nangko, itulah nan manantukan luak nan tigo, lareh nan duo. Satu jo luak Tanah Data, duo jo luak Tanah Agam, tigo jo luak Limo Pulueh, makok beradat malah maso itu, dipuhun bungo nan satangkai, barmuhun mamintak ampun kapado daulat nan pituan
nan tagak di bukik batu patah. 7. Ampun baribu kali ampun, ampunlah ambo di urang kayo kayo
sarato urang molie-molie, manti pagawai sidang palito, guru jo labai, imam dan khatib, malin maulana, pandeka, adik kakak, tuo mudo, hulubalang, pangulu nan gadang basa batuah, indak diatok dibilang gala, sambah takzim manjalani. Pihak dibadan diri ambo sambah manyambah kuranglah tahu, bakato-kato kuranglah pasieh, dipitatah kurang alemu, berfasiat lidah tajawueh bana, nan bak pitua hadis malayu :
Pandan mancolok Bangkahulu Kurang sajarum pakodian Pandai ma atok urang dahulu Kurang manyusun urang kudian
Makok ambo tagak manyambah, mangekuik surueh dengan tagah, takuiklah ambo ka manggeleang, saganlah ambo ka mambantah karano nan sifat di nan mudo, bacapek kaki baringan tangan, lah teratur terjumlah, ambo manyambahkan sambah, sambah tibo kapado pangulu nan gadang basa batuah, salam kumbali kapado tuanku yang alim lagi kiramat.
8. Sungguehpun ka Sutan surang tampek, ambo mawalikan buah
parsambahan dengan tertib majlisnyo, artinyo disusun jari nan sapulueh, bermohon mamintak ampun kapado niniek dengan mamak, imam khatib, cadiek pandai, sadok dilingkuang alek nangko. Jikok ado khilaf khilafat, adat balukih balimbago, gayuang dibari babalabeh dan kato ado mukasuiknyo. Jikok salisieh pandangaran, raso batuka dalam hati, silaturrahim diperbanyak, ambo rang mudo jolong tagak, gagap gantar bakatokato, aka kurang pandapek balun. Jikok nan bana takatokan, sananglah hati niniek mamak, jikok tasabuik di nan bukan, saiyo mintak dipaluruih, iyo di niniek dengan mamak. Niniek mamak nan gadang basa batuah, nan mamegang labuhan adat jo pusako, sarato timbangan cupak limbago, nan bacupak si talago panueh, nan bagantang si maharaja lelo, dijerong serambi papek, lautan aka gaduang bicaro. Tampek bamuti di nan cadiek, tampek batanyo di nan pandai, arif dibayang kato sampai, lah tarang sajo mukasuiknyo, hanyo sabuah nan dimintak; malah kalimpahan kapado niniek dengan mamak, hati rahim sangek pangasieh. Hukum tatap tidak barubah, adil nan bukan alangalang, sampai kini baitu juo. Saketek indak namuah kanai, nan bak bijo dalam buah, buah nan datang dari pado bijo, tuangan hanyo nan hilang, pusako baitu juo, kateh tarambun jantan, kabawah takasiek bulan, tangahtangah pumpunan banieh, lagi pangasieh ka nan mudo, jikok tadorong lakeh bacabuik, talampau lakeh bapintasi, nikmat baiek salamonyo.
Anak rang Padang anilah banang Dikumpa dilipek-llipek Dilipek lalu dipatigo Jikok dirantang namuehnyo panjang Kini dipunta naknyo singkek Singkek sokadar kapaguno
