F. MAMINTAK SIFAT PITUA
1. Mamintak Sifat Pitua Manuruik Syarak
Dari mamak, mamintak melalui Manti.
Sungguehpun ka angku surang tampek ambo mangarang mangantarkan sambah, mak bakarapatanlah niniek jo mamak, urang tuo nan gadang basa batuah, rupopun sudah kalihatan, nan duduek di janjang tanggo adat nan kiramat, sabab disifat sidik tabalie jo amanah, bijaksano samparono paham, biopari samparono hukum, nan mamacik hukum nan duo, hukum syarak batulan kitab, hukum adat batulan tambo, hukum syarak syariat molie nan turun daripado Allah, ditarimo daripado Nabi, wajib, sunat, hala dan haram, asah batal dengan mukarueh, lagi mambawo kaba suko.
Sakato mambari patunjuek, pihak kapado parsambahan indak diatok dibilang bana, hanyo jo sambah dimuliakan, kasudahan parsambahan ditibokan kapado angku Datuek.
Atolah nan akan diparsambahkan lah tu kini, satantangan paretongan kami nan duo balah pihak, samanjak tadi sampai kini, mah lah samo angku danga, kok nan manuruik adat lah kami parbincangkan, lai indak ado bangkak nan ka malatuih, bungkuek nan ka malatiang, tali nan ka putuih, sarato sangkutan nan ka sakah di kami nan basangkuik nan bakaitan, sarato kampuang nan tigo wajah.
Kok nan sawajah tantangan itu, Insya Allah mudah-mudahan kok di pusako lai lalu, kok di adat adolah lazim, lah jalan rayo titian batu, lah biaso ditampueh urang, lah sa ukue makok manjadi, lah sasuai makok takanak, lah batamu ruen jo buku, lah batamu untuang jo takadie, diateh paretongan kami nan duo balah pihak.
Kemudian nan dari pado itu, ateh indak sanang dihati, indak sunyi didalam kiro-kiro di kami nan duo balah pihak, supayo anak kami, kamanakan di mamak, nak nyo tamakan di nan halal, naknyo
tapakai di nan asah, iyolah nak sifat pitua pulo kami diateh syarak nan sabarih, supayo nak tantu asah jo bataln.yo.
Cuma itulah nan ka ambo pulangkan kapado angku jo parsambahan. 2. Mamintak Sifat Pitua Manuruik Adat
. Mamintak Sifat Pitua Manuruik Adat Yakni sifat atau pituah yang akan dilaksanakan dalam perhelatan yang sesuai dengan menurut adat salingka nagari dari ninik mamak.
Pihak di kami timba jo baliek, lah kawue nan barakek, lah pintak nan lah bulieh, nan bak undang andai jo bido, nan bak kato hadis malayu, manjadi mamang di nan mudo :
Si kadie nak urang di Bangkahulu Si Daud nak urang di patani Alah takadie sajak dahulu
Utang di kito manapati Limbak nan dari pado itu :
Balayie ka batu jaja Singgah sabanta di tapian Tak dapek untuang dikaja Kok tidak sarato jo bagian
Kalaluannyo bana lah tu kini, satantangan paretongan kami nan duo balah pihak, jikok mangaji alah dari alif, jikok babilang lai dari aso, mancari putieh tahan sasah, mancari hitam tahan tapo, ujuik satu paham sabuah, ka hilie lah sarangkueh dayuang, ka mudiek lah sarantak galah, bulek nan indak bapasagi, licin nan tidak basibiran, lah sa ukue mamak nan datang, lah sapakek mamak nan mananti, lah suko urang nan ka mamakai, lah sa ukue makok manjadi, lah sasuai makok takanak, janji alah kami karang, padan lah kami ukue, timbue bulan ko anak kami ka kami nikahkan. Baa toh hanyo di nan kini, karano kami barundiang dihadapan niniek jo mamak, supayo cancang naknyo balandasan, mangaik naknyo bapamegangan, areknyo naknyo bapangabek, taduehnyo nak bapangajang, nak tasanda di nan gadang, nak tagantuang di nan tinggi, batali nak bulieh di irik, batampuek nak bulieh dijinjiang, iyolah nak sifat pitua kami kapado sagalo niniek jo mamak. Cuma itulah nan akan dipulangkan kapado angku.
