Pasambahan Batimbang Langkah
1. PASAMBAHAN BATIMBANG LANGKAH
Setelah batamu rarak anak daro jo marapulai, mako mamak anak daro jo mamak marapulai ma atur jarak parantian anak daro dan marapulai, sekitar jarak lebih kurang 10 meter, dengan menggaris tanah, ditengah antaro ararak anak daro jo marapulai oleh Hulubalang. Kemudian dihadapan rarak masing-masing dilatakkan carano nan basungkuik jo dalamat, lalu mamintakkan izin kapado niniek mamak untuk mampasandiangkan anak darojo marapulai.
Setelah dapat izin sarato pitua jo pangaja daripado sagalo niniek mamak, tandonyo patuah di pusako, tanah dipijak kok nyo lambang, rumoik dipijak kok nyo layue, cupak tatagak ka baisi, adat takambang ka bapakai, pacah cupak badarai limbago. Kemudian barulah carano nan ado dimuko kaduo rarak diletakkan diateh garis nan dibuek oleh Hulubalang. Selanjutnyo baru dimulai kato paĊĦambahan dari mamak marapulai kapado mamak anak daro. i Sebelum mamak marapulai mamulai kato pasambahan, dia harus minta izin kapado niniek mamak dengan mengangkat kaduo tangan. Setelah izin diberikan oleh niniek mamak maka Rajo Malano (mamak marapulai) mamulai kato pasambahan : Maa Bandaro Mudo ! Lalukanlah Rajo Malano !
Awal dahulu kato bana, asal dahulu tampek tumbueh, tumbueh sarupo nan bak nangko, halal dikato nan doa, kato amanah kito pacik, kato kulipah kito pakai, usang pusako ditarimo dari Katumanggungan sarato Prapatieh nan Sabatang, iyolah adat dengan syarak, layienyo karangan jo buatan, bathinnyo garak daripado Allah waris nan daripado Nabi, kulipah nan daripado Rajo.
Batitih nan sapanjang alue, baturuik nan sapanjang jalan, bapakai sapanjang nan biaso, tiok turribueh makanan tiliek, tiok pekerjaan dengan sebab, hujan nan bamulo, panyakik nan berasal, angin nan bapuhun, kato nan bapangka.
Berawal makok berakhir, basabab makok manjadi, ba asa makok bamulo, adat nan dikatokan berasal limbago, hujan nan bapuhun. Samo bak bungka jo naraco, nak samo naiek ka timbangan, mancari putieh tahan sasah, mancari hitam tahan tapo, haluih nan tidak basisieh, putieh nan tidak bakotoran, hukum adil tahan tandiang, bana lah bulieh tahan sudi.
Pihak kapado pasambahan indak ka diatok dibilang bana, hanyo jo sambah dimuliakan, kasudahan parsambahan ditibokan kapado Bandaro Mudo.
Atolah nan banamo diparsambahkan lah tu kini, pusako banyak pusako, pusako ba ateh tumbueh, tumbueh sarupo nan bak nangko, dihari nan sahari kini, hari baiek kutiko elok, angin tanang ombak salasai, disinan parahu dilayiekan, hari kagadangan di niniek dengan mamak, kabasaran di anak daro jo marapulai, ma lah batamu anak daro jo marapulai dilabueh nan golong, di pasa nan rami, supayo rantak naknyo sadagan, lenggang naknyo saayun, nak kawi adat kito pakai, nak lazim syarak kito tompang, nak sarumpun undang jo pusako, iyoiah nak mamintakkan izin kami kapado sagalo niniek jo mamak. Cuma itulah nan ka ambo parsambahkan kapado Bandaro Mudo.
Lah sampai di Rajo Malano ?
Sakiro-kiro baitu Bandaro Mudo !
Maa Rajo Malano ! Sampaikanlah Bandaro Mudo ! ..
Makok nyo kato ka dijawab samo to ucap malah Allah, samo to kekuik malah Nabi, Nabi Muhammad SAW, waris nan tidak bulien hilang, dipakai juo salamonyo, sajaknyo sumue ka dikali, mulonyo rantiang ka disakah, layang malayang sambah tibo, timpo batimpo salam datang, tagak basamo jo nan banyak, rundiangan tapacik di basamo, kato tapegang di nan tuo, nan tagueh bakeh bagantuang, iyolah pangulu dalam nagari.
Pihak kapado parsambahan, indak kan diatok dibilang bana, hanyo jo sambah dimuliakan.
Kasudahan parsambahan dikembalikan kapado Rajo Malano.
Pado kito basamo ! (jawab Rajo Malano)
Pihak kapado parsambahan Rajo Malano nan katangah, nan sampai kapado ambo,
Indak bak raso ka didulang Didulang juolah ameh dipalangki Sa ameh tingga ditintingan.
Indak bak raso ka diulang Diulang juo kato nan tadi Nak jaleh kato nan kudian
Atolah nan manjadi parsambahan di Rajo Malano lah tu kini, angin tanang ombak salasai, disinan parahu dilayiekan, hari kagadangan di niniek mamak, kabasaran di anak daro jo marapulai, ma lah batamu anak daro jo marapulai, dilabueh nan golong, di pasa nan rami, supayo rantak nak nyo sadagan, lenggang nak nyo sa ayun, nak kawi adat kito pakai, nak lazim syarak kito tompang, nak sarumpun undang jo pusako, iyolah nak mamintakkan izin kapado sagalo niniek jo mamak. Kan baitu bana Rajo Malano ? Sakiro-kiro baitu Bandaro Mudo ! (jawab Rajo Malano)
Pihak kapado parsambahan Rajo Malano nan katangah, itulah kato sabananyo, ibarat aie lah manampueh ka iliran, kato lah baranang ka pusako. Lah ditakuek tibonyo tabang, lah dibarin tibonyo pahek, mangarekpun alah dalam ukuran. Bagaipun baitu sakali, mah dek karano kito lai babincang dihadapan niniek jo mamak, kito japuikkan nan kasifat di kito timba jo baliek, mananti Rajo Malano sakutiko.
Ka banantinyo Bandaro Mudo !