1 PARSAMBAHAN DI MEDAN TANGAH HALAMAN
Sesampai di rumah anak daro rarak tadi ditarimo di halaman rumah anak daro, barulah diadokan pidato pasambahan dari mamak marapulai kapado mamak anak daro sebagai berikut : 1. Mintak izin kapado sagalo niniek jo mamak 2. Kedua pengantin didudukkan di kursi 3. Semua baban nan dibawa diletakkan dihadapan anak daro
marapulai dengan susunan teratur manuruik adat.
Barulah dilaksanakan parsambahan.
Maa Bandaro Mudo ?
Sampaikan Rajo Malano !
Sambah sujuik salam diucap, sidang kapado niniek jo mamak, salam tajelo ka nan rapek, sambah tatabue ka tangah-tangah, maaf dimintak ka basamo (sambil mengangkat tangan dari kanan sampai ke kiri), tatabue intan dari pagai, tabayang lalu ka lautan, indah sakali cahayonyo.
Bukannyo toh hanyo ambo urang tahu cadiek pandai pusako kato disambahkan, parsambahan ditibokan kapado Bandaro Mudo. Sungguehpun kapado Bandaro Mudo sorang tampek ambo manyampaikan kato nan sapatah, mak bakarapatanlah angku nan tuo-tuo, niniek mamak nan saundang, pucuek bulek jo urek tunggang, panjangnyo tak dapek di ukue, lebanyo tak dapek dibidai, nan salilik lingkaran kaniang, ikek santuang dikapal tiok katuek ba undang-undang, tiok liku aka manjala, dalam karuik budi marangkak, tabuek dipaham tiok lipek, lebanyo pandindiang kampuang, pandukuang anak kamanakan, amparan di rumah tanggo, paraok gonjoang nan ampek, ka payuang panji di halaman, pandindiang koroang jo kampuang, syariat waris mandirikan, nan dilingkuang cupak adat, bulieh balinduang kapanasan, tampek batadueh kahujanan, pihak kapado parsambahan indak ka diatok ka dibilang bana, hanyo jo sambah dimuliakan, kasudahan parsambahan ditibokan kapado Bandaro Mudo. Salam takzim dari ambo nan terhadap kapado Bandaro Mudo, perhubungan sillaturrahim, ambo iringi dengan sambah sujud ka wajah yang amat molie, pangulu yang amat basa, urang tuo nan gadang basa batuah, nan duduek di janjang adat, kiramat sabab di sifat sidik, tabalie jo amanah, bijaksano samparono paham, biopari samparono hukum, nan mamacik hukum nan duo, hukum syarak batulan kitab, hukum adat batulan tambo. Hukum syarak syariat molie, nan turun daripado Allah, ditarimo daripado Nabi, wajib, sunat, halal dan haram, asal batal dengan mukarueh, lagi mambawo kaba suka, sarato mambari patunjuek. Mangkok manyambahkan sambahlah ambo, di ateh duo tigo parkaro, ampek dan limo martabat, yakni martabat sambah nan ampek :
Partamo
: sambah
Kaduo
: simpueh
Katigo : manyusun jari nan sapulueh Ka ampek : manakuekan kapalo, kaharibaan pangulu
Adapun pangulu itu bulieh limpah kamurahan dari Sultan Iskandar Mudo, jawueh nan bardaulat, ampie nan bersuaro, datang manjalang nagariko. Seperti alam payuang panji, marawa basa mambukakan pintu kebaikan, manutuik pintu kejahatan. Makok di ateh, ateh mangkuto, dibawah tirai tabantang, rajo nan sadaulat, pangulu nan sa andiko, ibarat kayu gadang manangah koto, tampek batadueh kahujanan, bulieh balinduang kapanasan, naiek dari janjang, turun dari tanggo, lagi johari bijaksano, manih muluik bakato-kato, mamegang labuhan adat jo pusako, timbangan cupak jo limbago.
Kemudian nan dari perbilangan pengangkatan derajat pangulu, dipilieh, di imam, di khatib, di nan baiek di nan molie, di juaro karapatan, mak sakali lah ambo mangarang mangantarkan sambah, kasudahan parsambahan ditibokan kapado Bandaro Mudo.
Kapado kito basamo!
Atolah nan banamo diparsambahkan kapado Bandaro Mudo lah tu kini, satu kato pusako, kaduo kato balimbago, katigo kato parmulaian. Jikok dikato nan pusako, bajanjang naiek batanggo turun, ragi takambang nan baguntiang, cupak tatagak nan ba isi, basuri batiladan kain, itulah cupak di pangulu, jikoknyo cupak nak ma isi, limbago adat nak manuang, adat takambang nak mamakai, dikatokanlah tumbueh pekerjaan baiek, didalam Korong kampuang ko, ketek kajo gadang pakajan, sialah nan punyo pekerjaan nangko, iyolah niniek mamak urang nan ampek jinih dalam nagari.
Selang dibari ba sipangka, karajo dibari basipokok, sialah nan jadi pokok pangkanyo lah tu kini, iyolah urang korong Caniago jo urang Korong Bendang. Dahulu bathin kemudian lahie, dilayienyo alah barupo jo batampang, iyolah si "A" dengan si "B" alah selamat nikah kawin. Nikah nan dengan perempuan, kawin nan dengan niniek mamak, ijab nan dari mutawali, izin nan dari anak daro, Kabul nan dari marapulai, didalam sidang musajik, dimuko saksi jo baiyyinah, dalam syarak sudahlah sah, lah langkok rukun jo syaratnyo. Nyatonyo adat ba ateh tumbueh, nyato pusako ba enggeran, tumbueh sarupo nan bak nangko, dihari nan sahari kini, makok datanglah kami dari Korong Caniago, ka Korong Bendang nangko, di ateh janji nan dikarang, padan nan di ukue. Janji dikarang samo ditapati, padan di ukue samo dilalui, ibarat karih ka dipulangkan ka saruangnyo, pinang ka dipulangkan ka tampueknyo, sirien ka dipulangkan ka gagangnyo, marapulai ka dipulangkan ka rumahnyo, pulangnyo bukan pulang sajo, pulang di anta mande bapak, sarato niniek dengan mamak, sarato andan pasumandan, langkok jo anak mudo-mudo, sarato inang pangasuehnyo, mambawokan nan manuruik adat, tandonyo alamat putieh hati, tando alamat muko janieh, putieh nan tidak bakotoran, hitam nan tidak dibari bajo, mamariahkan alek jamuang nangko, sunat jamuan marapulai.
Ba go iyo bacangkie aie, ba go iyo sajamba nasi, walaupun tidak sasadangnyo, makok kami bawokan juolah nan beradat nan bapusako, iyolah sirieh di carano, nasi kunik nan sacogok, nasi gadang jo nasi bujang, bareh di dulang indak dihetong, saiyo nak mintak ditarimo jo hati nan suci, jo muko nan janieh di Bandaro Mudo, di ateh selang nan bapangka, karajo nan bapokok,. Cuma itulah nan ka ambo sampaikan kapado Bandaro Mudo.
Lah sampai di Rajo Malano ?
Sakiro-kiro baitu Bandaro Mudo ! Maa Bandaro Mudo ?
Parsambahan dikembalikan kapado Bandaro Mudo !
Pado Allah ! (jawab Bandaro Mudo)
Sairiang balam jo barabah Balam tabang barabah mandi Sikue tagulampai di sumayan
Sairiang salam dengan sambah Salam datang sambah kumbali Parsambahan dikumbalikan juo kapado Rajo Malano.
Jawab Bandaro Mudo :
Sungguehpun ka Rajo Malano sorang ka tampek ambo mawalikan buah parsambahan dengan tertib majelisnyo, artinyo disusun jari nan sapulueh, barmuhun mamintak maaf kapado niniek dengan mamak, imam khatib cadiek pandai adok dilingkuang oleh ruanganko, jikok ado khilaf khilafat, adat balukih balimbago, gayuang dibari babalabeh dan kato ado mukasuiknyo, jikok salisieh pandangaran raso batuka dalam hati, silaturrahim dipabanyak, ambo rang mudo jolong tagak, gagap gantar bakato-kato, aka kurang pandapek balun, jikok nan bana takatokan, sananglah hati niniek mamak, jikok tasabuik di nan bukan, saiyo mintak dipaluruih, iyo di niniek dengan mamak, niniek mamak nan gadang basa batuah, labuhan adat jo pusako, sarato timbangan cupak jo limbago, nan bacupak si talago panueh, nan bagantang si maha rajo lelo, di jerong sarambi papek, lautan aka gaduang bicaro, tampek bamukti di nan cadiek, tampek batanyo di nan pandai, arif di bayang kato sampai, lah tarang sajo mukasuiknyo, banyo sabuah malah diharap kalimpahan kapado niniek dengan mamak, hati rahim sangek pangasien, hukum tatap tidak barubah, adil nan bukan alang-alang, sampai kini baitu juo, jikok ma ukue samo panjang, jikok mangati samo barek, jikok ma uji samo merah, saketek tidak namueh kanan, nan bak bijo didalam buah, buah nan datang daripado bijo, tuangan hanyo nan hilang, pusako baitu juo. Ka ateh tarambun jantan, ka bawah takasiek bulan, tangah-tangah kumpulan banieh, lagi pangasieh ka nan pumpunan mudo, jikok tadorong lakeh bacabuik, talampau lakeh bapintasi, nikmat baiek salamonyo.
Anak rang Padang anilah banang Dikumpa dilipek-lipek Dilipek dibagi duo
Jikok dirantang namuehnyo panjang Kini dipunta naknyo singkek Singkek sakadar ka paguno
Pihak kapado parsambahan, indak kan diatok dibilang bana, hanyo jo sambah dimuliakan. Kasudahan parsambahan dikembalikan juo kapado Rajo Malano.
Pihak kapado parsambahan Rajo Malano nan katangah, nan tairiang nan tabantang, nan tatabue katangah-tangah, nan talancang kamuko rapek, nan sampai kapado ambo, jikok didangaan bunyi baritonyo, dipandang alah baiek rupo, didanga alah baiek bunyi, alah bunta bak sawah nan sapiriang, lah boneh bak padi nan satangkai, indak bak raso ka didulang, pandulang ameh dipalangki, sa ameh tingga ditintingan, indak bak raso ka diulang, diulang juolah kato nan tadi, nak jaleh kato nan kudian.
Atolah nan manjadi buah parsambahan di Rajo Malano lah tu kini, pihak kapado pekerjaan nangko, dahulunyo bathin kamudiannyo lahie, dilayienyo alah barupo jo batampan, iyolah si “A” dengan si “B” alah selamat nikah kawin dengan perempuan, kawin nan dengan niniek mamak, ijab nan dari mutawali, izin nan dari anak daro, Kabul nan dari marapulai, di dalam sidang musajik, dimuko saksi jo bayyinah dalam syarak sudahlah sah, lah langkok rukun jo syaratnyo, nyatonyo adat baateh tumbueh, nyato pusako ba enggeran, tumbueh sarupo nan bak nangko, dihari nan sahari kini, makok datanglah kami dari Korong Caniago ka Korong Bendang nangko, di ateh janji nan dikarang, padan nan diukue, janji dikarang samo ditapati, padan di ukue samo dilalui, ibarat karih ka dipulangkan ka saruangnyo, pinang dipulangkan ka tampueknyo, sirieh dipulangkan ka gagangnyo, marapulai dipulangkan ka rumahnyo, pulangnyo bukan pulang sajo, pulang dianta mande bapak, sarato niniek dengan mamak, sarato andan pasumandan, langkok jo anak mudo-mudo, sarato inang pangasuehnyo, mambawokan nan manuruik adat, tandonyo alamat putieh hati, tando alamat muko janieh, putieh nan indak bakotoran, hitam nan tidak bari bajo, mamariahkan alek jamu nangko, sunat jamuan marapulai, bago iyo sacangkie aie, bago iyo sajamba nasi, walaupun tidak sasadangnyo, makok kami bawokan juolah nan beradat nan bapusako, iyolah sirieh di carano, nasi kunik nan sacogok, nasi gadang jo nasi bujang, bareh di dulang indak dihetong, saiyo nak mintak ditarimo jo hati nan suci, jo muko nan janieh diselang nan bapangka karajo nan bapokok, kan itu bana nan manjadi buah parsambahan di Rajo Malano ? Sakiro-kiro baitu baru Bandaro Mudo.
Maa Bandaro Mudo ?
Pihak kapado parsambahan Rajo Malano nan katangah, itulah kato sabananyo, ibarat bak aie lah manampueh ka iliran, kato lah baranang ka pusako, lah ditakuek tibonyo tabang, lah dibarih tibonyo pahek, mangarekpun alah dalam ukuran. Bagaipun baitu sakali, sabab tajunnyo ka bajawab, sabab tajalue ka batunai, tagak didalam karapatan, rundingan dibawo jo baiyo, kato dibawo jo mufakat. Baa to hanyo di nan kini, mah dek karano kami di ateh namo nan salarak sabondong tibo, sarato jo niniek dengan mamak, lai pulo duduek baropok tagak bapusu, supayo nak bulek aie ka pambulueh, nak bulek kato ka mufakat, ambo paiyokan pulo agak sapatah kato, mananti Rajo Malano jo parsambahan sakutiko.
Lah sampai di Bandaro Mudo ?
.
Sakiro-kiro baitu Rajo Malano !
Maa Rajo Malano ?
kok talambek gayuang basambuik, kok talambek kato bajawab, reda jo maaf ambo mintak nyo Rajo Malano.
Maa Bandaro Mudo !
Pihak kapado parbanaran Bandaro Mudo nan ka tangah, itulah kato sabananyo. Renjeanglah kato jo mufakat, bawolah kato jo baiyo, ka ambo nanti sajo nyo Bandaro Mudo.
Lalu Bandaro Mudo mampaiyokan atau mambulekkan aie ka pambulueh ateh namo sipangkalan, saruto mande jo bapak. Setelah dapek kato mufakat, lah bulek aie ka pambulueh mako Bandaro Mudo mamulangkan kembali kapado Rajo Malano.
Maa Rajo Malano ?
Dagueh daga bunyi padati Manurun cando pinang awan
Tadi Rajo Malano sifat mananti
Ambo sifat mampaiyokan
Setelah ambo paiyo patidokan, lah ambo pagencong pagamakkan, lah dapek pulo nan ka jawab barinyo.
Atolah nan ka jadi jawab jo barinyo di ambo lah tu kini, pihak kapado kadatangan Rajo Malano sarato jo niniek dengan mamak, sarato marapulai, sarato jo pambawaan, kok di kami ateh namo selang nan bapangka karajo nan bapokok, lah ka batarimo sajo jo hati nan suci jo muko nan janieh. Tapi samantangpun baitu, manjambokan sajo tangan kok panjang, mangumbalikan tangan kok pendek, mamulangkan sakali tidak, ka baa pulo nan sifat di ambo tu Rajo Malano ? Maa Bandaro Mudo ?
Apo pulolah nan manjadi buah parbanaran di Bandaro Mudo lah tu kini, pihak kapado kadatangan kami nan salarak sabondong tibo, sarato jo pambawaan, lai ka batarimo jo hati nan suci, jo muko nan janieh. Tapi di Bandaro Mudo nan manggamang nan marusueh nan marisau didalam hati, manjambokan sajo tangan kok panjang, mamulangkan tangan kok pendek, mangumbalikan sakali tidak, ka baapo nan kajadi sifat di Bandaro Mudo. Kan baitu bana Bandaro Mudo ?
Sakiro-kiro baitu bana Rajo Malano.
Maa Bandaro Mudo ?
Pihak kapado parbanaran Bandaro Mudo nan ka tangah tu, itulah kato sabananyo, bagaipun baitu sakali:
Pai ka parak karamuntiang Serong palakek pulang mandi
Malah ragi takambang nan baguntiang Cupak tatagak nan ba isi
Lai dalam adat dalam pusako, lan ka bak tumbueh bak luluehnyo sajo nyo Bandaro Mudo.
Selanjutnya mambawo naiek ka ateh rumah.
