Pasambahan Kadudukan Di Ateh Rumah
L. PARSAMBAHAN KADUDUKAN DI ATEH RUMAH
Maa Rajo Malano
Parsambahan disampaikan kapado Rajo Malano, mako barmohonlah ambo mamintak izin kapado niniek dengan mamak, nan mamegang labuhan adat jo pusako, sarato timbangan cupak jo limbago nan kiramat sabab disifat sidik tabalie jo amanah, bijaksano samparono paham alam lapang susunan nyato, tinggi tak dapek disigai, dalam tak dapek di ajuek, amban puruek gudang ilmu, balerong anjuang sari adil, pihak kapado parsambahan indak kan diatok dibilang bana, hanyo jo sambah dimuliakan. Kasudahan parsambahan ditibokan kapado Rajo Malano.
Atolah nan banamo diparsambahkan lah tu kini pihak kapado kadudukan niniek dengan mamak, sarato anak daro jo marapulai, sarato kito nan basamo. Kok ado jujueh jo pangkuen, kok ado ereang dengan gendeang, aturan diujuang kok dipangka, alue dipangka kok di ujuang, aturan ditangah kok ditapi, alue ditapi kok ditangah, saiyo nak mintak sifat kami kapado niniek dengan mamak.
Cuma itulah nan ka ambo sampaikan kapado Rajo Malano.
Lah sampai di Bandaro Mudo? Sakiro-kiro baitu Rajo Malano!
Maa Bandaro Mudo?
Parsambahan dikembalikan kapado Bandaro Mudo. Sungguehpun kapado Bandaro Mudo nan ta imbau gala diawal kato nan sapatah, mak bakarapatanlah Bandaro mudo di ateh selang nan bapangka, jumlah karajo nan bapokok, nan bakakak nan baradiek, nan baipa nan babisan, nan baurang, urang sumando, langkok juaro jo pitunggue, sarato karangan jo buatan, ketek indak ka disabuik namo, gadang indak ka di imbau gala, amak jo sambah dimuliakan. Bukan toh ambo bak raso ka malampau malintasi dari parbilangan niniek dengan mamak, imam khatib kari maulana, hulubalang jo ampang limo, cadiek pandai ado di dalam. Pihak kapado parsambahan indak ka diatok dibilang bana hanyo jo sambah dimuliakan. Kasudahan parsabahan di kembalikan kapado Bandaro Mudo.
Pado kito basamo!. (Jawab Bandaro Mudo)
Atolah nan manjadi buah parsambahan di Bandaro Mudo lah tu kini, pihak kapado tantangan kadudukan niniek dengan mamak lah tu kini, sarato anak daro jo marapulai, sarato kito nan basamo, kok ado ereang dengan gendeang, kok ado jujueh dengan pangkueh, aturan di ujuang kok dipangka, aturan ditangah kok ditapi, saiyo nak mintak sifat Bandaro Mudo kapado sagalo niniek jo mamak, Kan baitu bana Bandaro Mudo?.
Maa Rajo Malano?.
Sakiro-kiro baitu Rajo Malano.
Maa Bandaro Mudo?
Pihak kapado parsambahan Bandaro Mudo nan katangah, jikok ditiliek takrimnyo sambah, dinilai lapa maknanyo, ujuik mukasuik dalam hati, lah nyatonyo adat babateh tumbueh, nyato pusako ba enggeran, tumbueh sarupo iko kini, mah dek karano kito kateh lai dapek maningadah kiri kanan lai dapek baiyo, ambo bulekkan aie ka pambulueh, ambo bulekkan kato ka mufakat, ambo japuikkan nan ka sifat di Bandaro Mudo kapado sagalo niniek jo mamak, mananti Bandaro Mudo jo parsambahan sakutiko.
"Lalu Rajo Malano manjapuikkan sifat pituanyo kapado sagalo niniek jo mamak. Setelah dapek aie nan satitiek, kato nan sapatah dari pado sagalo niniek jo mamak mako dipulangkanlah kembali kapado Bandaro Mudo"
Maa Bandaro Mudo?
Ka Sumani mambali padi Di Selayo buangkan sakam
Tadi Bandaro Mudo sifat mananti Ambo sifat mampaiyokan
Setelah ambo paiyo patidokan, lah ambo pagencong pagamakkan, atolah nan kajadi jawab jo barinyo lah tu kini :
Baririk biduek di muaro Sabuah kapa salinggani
Kok sampik duduek indak ka mangapo Nan bedo sampik di dalam hati
Limbak nan dari pado itu :
Gadang aie sangkak puyueh Balahan nan dari aka gadang
Sagadang-gadang biduek bak kato pangayueh
Sagadang-gadang alek bak kato sirajo janang. Malah badie tasandang di pandeka Ayam lah takapik di juaro
Ka Baa banalah tarang dimusang
Labieh tarang malah di alang Kito sarahkan sajo kapado janangnyo Bandaro Mudo?
Lah sampai di Rajo Malano tu? Sakiro-kiro baitu Bandaro Mudo!
"Malah bulieh aie nan satitiek kato nan sapatah dari pado sagalo niniek jo mamak, kasifat beramal kito nyo Rajo Malano".