K. PARSAMBAHAN MAMBAWO NAIEK
KA ATEH RUMAH
Bandaro Mudo mambawo naiek Rajo Malano.
Maa Rajo Malano ?
Parsambahan ditibokan kapado Rajo Malano !
Sampaikanlah Bandaro Mudo !
Makok badirilah lawik nan sadidih sampai ka ombak nan badabue, itu kabasaran rajo kito, sungai banamo sungai ameh, ikan batalue dalam batu, mangkok dirumbuehkan Allah Taala, malah kirokironyo Datuek Katamanggungan duo jo Datuek Parpatih Nan Sabatang, urang nan cadiek kaduonyo, lagi johari bijaksano, manih muluik bakato-kato, pado malam inyo bapikie, dapek pikiran maso itu, makok manikam batu malah dengan karih, karih banamo Cumadak Intan, karih bakaluek patah tigo, sakarek ka Banuhurum, sakarek ka Bandur Cino, sakarek tingga di alam Pulau Paco, makok itulah nan manantukan luhak nan tigo, lareh nan duo, satu jo luhak tanah Agam, duo lunak Tanah Data, tigo jo luhak Limo Pulueh, mako baeradat malah maso itu, dipuhun bungo nan satangkai, bermuhun mamintak ampun kapado daulat nan pituan nan tagak dibukik batu patah.
Pihak kapado parsambahan, indak ka diatok dibilang bana, hanyo jo sambah dimuliakan. Kasudahan parsambahan ditibokan juo kapado Rajo Malano. Atolah nan banamo diparsambahkan kapado Rajo Malano lah tu kini, dek karano medan ko ado diateh duo tigo parkaro:
- Partamo medan tangah labueh - Kaduo medan tangah halaman • Katigo medan di ateh rumah
Jikok di medan nan duo, dipandang alah bajek rupo, didanga alah baiek bunyi, kok rantak lah sadagan, lenggang alah sa ayun, baa toh hanyo di nan kini, nak kawi adat kito pakai nak lazim syarak kito tompang, nak nyaman raso paratian, nak sanang hati kami selang nan bapangka, karajo nan bapokok, iyolah nak mambawo sagalo niniek dengan mamak sarato sanak jo sudaro sarato anak daro jo marupulai sarato inang pangasuehnyo, iyolah ka medan di ateh rumah.
Saiyo nak mintak dituruikkan jo hati nan suci jo muko nan janieh. Cuma itulah nan ka ambo sampaikan ka Rajo Malano. Lah sampai di Bandaro Mudo ? Sakiro-kiro baitu Rajo Malano !
Maa Bandaro Mudo ?
Parsambahan dikembalikan kapado Bandaro Mudo !
Awal dahulu kato bana, asal dahulu tampek tumbueh, tumbueh sarupo nan bak nangko, halal dikato nan duo, kato amanah kito pacik, kato kulipah kito pakai, usang pusako ditarimo dari niniek Katamanggungan sarato Parpatih nan Sabatang, iyolah adat dengan syarak, layienyo karangan jo buatan, bathinnyo garak daripado Allah, waris nan daripado Nabi, kulipah nan daripado rajo. Batitih nan sapanjang ........ ............., baturuik nan sapanjang jalan, bapakai sapanjang nan biaso, tiok tumbueh makanan tiliek, tiok pekerjaan dengan sebab, hujan nan bamulo, panyakik nan barasal, angin nan bapuhun, kato nan bapangka, berawal makok berakhir, basabab mako manjadi, ba asa makok bamulo, adat nan dikatokan berasal dari limbago, hujan nan bapuhun samo bak bungka jo naraco, nak samo naiek ka timbangan, mancari putieh tahan sasah, mancari hitam tahan tapo, haluih nan tidak basisiek, putieh nan tidak bakotoran, hukum adil tahanan bandiang, bana lah bulieh tahan sudi.
Pihak kapado parsambahan indak ka diatok dibilang bana, hanyo jo sambah dimuliakan. Kasudahan parsambahan dikembalikan juo kapado Bandaro Mudo.
Atolah nan banamo diparsambahkan lah tu kini, mak der Karano medan ko ado ateh duo tigo parkaro :
- Partamo medan tangah labueh - Kaduo medan tangah halaman - Katigo medan di ateh rumah
Jikok di medan nan duo, dipandang alah baiek rupo, didangapun alah baiek bunyi, kok rantak mah alah sadagan, lenggangpun alah sa ayun. Baa to hanyo di nan kini, supayo nak kawi adat kito pakai, nak lazim syarak kito tompang, nak sanang hati mande jo bapak, nak santoso Korong jo kampuang, iyolah nak mambawo kami di ateh namo nan salarak sabondong tibo, sarato jo niniek dengan mamak, sarato anak daro jo marapulai, sarato inang pangasuehnyo iyo ka medan di ateh rumah. Supayo dituruikkan jo hati nan suci jo muko nan janieh. Kan baitu bana Bandaro Mudo ?
Sakiro-kiro baitu Rajo Malano !
Maa Bandaro Mudo !
Pihak kapado parsambahan Bandaro Mudo nan ka tangah, itulah kato sabananyo, ibarat aie lah manampueh ka iliran, kato lah baranang ka pusako lah ditakuek tibonyo tabang, lah dibarih tibonyo pahek, mangarekpun alah dalam ukuran.
Bagaipun baitu sakali, sabab tajunnyo ka bajawab, sabab tajalue ka batunai, tagak dalam karapatan, rundiangan dibawo jo baiyo, kato dibawo jo mufakat, baa to hanyo dinan kini ambo paiyokan pulo agak sapatah kato, nak dapek nan kajadi jawab jo barinyo, mananti Bandaro Mudo sakutiko. Ka ambo nantinyo Rajo Malano !
Lalu Rajo Malano mampaiyokan kapado nan salarak sabondong tibo sarato jo niniek dengan mamak. Setelah dapek aie nan satitiek, kato nan sapatah daripado sagalo niniek jo mamak, lalu Rajo Malano mamulangkan kembali kapado Bandaro Mudo.
Maa Bandaro Mudo ?
Tabanglah buruang marapati Tabangnyo manyisi-nyisik awan
Tadi Bandaro Mudo sifat mananti Ambo sifat mampaiyokan
Setelah ambo paiyo patidokan lah dibulekkan aie ka pambulueh, lah dibulekkan kato ka mufakat, atolah nan manjadi ka jawab jo barinyo di ambo lah tu kini :
Anak urang di Sungaipanueh Kamumu di halaman rumah
Sadang kamari kami lai namueh Kunun kok naiek ka ateh rumah
Limbak nan daripado itu :
Intimun batiek sari lundang Anyuik sabalah Batanghari
Batanyo kami kapado janang Janjang nan mano nan ka kami naiki
Cuma itulah nan ka ambo sampaikan kapado Bandaro Mudo
Maa Rajo Malano ?
Pihak kapado parsambahan Rajo Malano nan katangah, itulah kato sabananyo. Bagaipun baitu sakali, basuo juo bak pitua Rajo Malano tu :
Intimun batiek sari lundang Anyuik sabalah Batanghari
Kalau batanyo Rajo Malano kapado janang
Turuikkan sajolah janang kami Kemudian barulah anak daro marapulai dibawo naiek ka ateh rumah, diiringi dengan carano jo niniek dengan mamak, sarato alek jamu nan hadir diateh namo nan salarak sabondong tibo.
