P. PARSAMBAHAN PANYALASAIAN CAKAH KAIK
ANTARO MAMAK TIMBA JO BALIEK
(Ka Niniek Mamak Nan Manuruik Adat, Dek Karano Karajo - Ado Diateh Duo Tigo Parkaro)
Cakah kaik merupakan kegiatan menyelesaikan segala permasalahan yang terkait dalam pelaksanaan perhelatan/pesta dari awal sampai selesai Karajo nan duo tigo parkaro yaitu :
1. Kaik
Kaik artinyo sangkutan atau hubungan yang dikaitkan menurut adat adalah adat yang akan tibo, supayo sangkutan nak jan sakah, tali nak jan putuih, yakni apo-apo nan akan dilaksanakan dimaso nan akan datang.
2. Upah Lalu
Yang dimaksud dengan "upah lalu" yaitu pambarian sapiriang sawah yang berasal dari bali mande bapak atau tambilang perak yang akan diberikan kapado menantu sacaro langsuang, kalau manuruik adat, boleh menjadi hak milik kedua penganten sampai bakaturunan dan boleh digolok jo gadai, sasuai kebutuhan dan keperluan yang mendesak. 3. Upah Bajodu
Yang dimaksud dengan "upah bajodu" ialah sawah yang diberikan oleh mamak atau niniek mamak yang berasal dari pusako tinggi, disebut sebagai "mamak mambari takok adok (modal) untuk urang sumando dalam mamulai kehidupan berumah tangga.
Sawah tersebut diberikan sebanyak duo piriang dengan penyerahannyo disaksikan oleh mamak jo niniek mamak timba baliek, basarato jo niniek mamak dalam nagari, yang akan mamacik mangganggam paretongan anak kamanakan timba jo baliek, dengan syarat : mangaluakan limbago kapado niniek mamak sabanyak 8 (delapan) uang.
Keterangan :
Delapan uang yaitu delapan jenis nilai uang yang masih berlaku seperti :seratus ribu, lima puluh ribu, dua puluh ribu, sepuluh ribu, lima ribu, lima ratus dan dua ratus.
Upah bajodu terkait dengan kegiatan yang sudah dilaksanakan nan manuruik adat seperti :
1. Batimbang langkah, jikok tanah tapijak koknyo lambang, rumpuik
tapijak kok nyo layue, dikeluarkan limbagonyo kapado niniek mamak, tando cupak tatagak ka ba isi, adat takambang ka
bapakai, sebanyak delapan uang. 2. Urak selo yang dilaksanakan manuruik adat, itulah nan disabuik
datang nan bajapuik-japuik, pulang nan ba anta-anta dengan memulangkan kembali keris yang dipegang niniek mamak sewaktu manjapuik marapulai untuk pulang ka rumahnyo dengan tebusan sebanyak delapan uang.
Pelaksanaan Mambukak Kaik
Parsambahan dari mamak anak daro kapado mamak marapulai dalam acara ma anta nasi. Maa Rajo Malano ?
Sampaikanlah Bandaro Mudo !
Salam takzim dari ambo nan terhadap kapado Rajo Malano perhubungan silaturrahim diiringi dengan sambah sujud ke wajah nan amat mulia, pangulu nan amat basa, urang tuo nan gadang basa batuah, nan duduek di janjang tanggo adat, kiramat sebab disifat sidik tabalie jo amanah, bijaksano samparono paham, biopari samparono hukum, nan mamacik hukum nan duo, hukum syarak batulan kitab, hukum adat batulan tanibo, hukum syarak syariat molie nan turun daripado Allah, ditarimo daripado Nabi, wajib, sunat, halal dan haram, asal batal dengan mukarueh lagi mambawa kaba suko sarato mambari patunjuek.
Pihak kapado parsambahan, indak kan diatok dibilang bana hanyo jo sambah dimuliakan. Kasudahan parsambahan ditibokan juo kapado Rajo Malano. Atolah nan banamo diparsambahkan lah tu kini:
Dititik galang nak urang Koto Tuo Dibari baukie batampuek manggih
Mulo babilang dari aso
lyo mangaji dari alif
Alif ba ta didalam surek, huruf ejaan tigo pulueh, biopari pantun ibarat, pucuek kiasan jolong tumbueh, tumbueh sarupo nan bak nangko, alue jo patuik lah sakabek, adat jo syarak lah sajinjiang, adat lah jadi darah dagiang, syarak lah jadi sandi alam.
Nyatonyo adat ba bateh tumbueh, nyato pusako ba enggeran, tumbueh sarupo nan bak nangko, pusako banyak pusako, pusako ba ateh tumbueh, tumbueh sarupo iko kini, adat nan tigo kito pakai :
1. Sambah manyambah 2. Baso jo basi 3. Sirieh jo pinang
Sambah manyambah dalam adat, tali batali undang-undang, bapakai bamuluik manih, muluik manih talempong kato, baso baiek gulo di bibie, didalam cupak nan piawai, dilingkuang adat jo pusako, adat nan banamo sopan santun. Kalaluannyo bana lah tu kini, aluran carano nan katangah, nan talatak diharibaan Rajo Malano dilayienyo, dibathinnyo iyolah kapado Rajo Malano nan babirian, Insya Allah mudah-mudahan ado barisi bakalangkapan. Kalaluannyo banalah tu kini, tanam sirieh tanamlah pinang, tanak karakok didalam padi. Cabieklah sirieh gatoklah pinang, golonglah rokok pamenan jari. Dilayienyo carano nan katangah, dibathinnyo manganduang niek jo mukasuik. Cuma itulah nan ka ambo sampaikan kapado Rajo Malano. Lah sampai di Bandaro Mudo ?
Sakiro-kiro baitu Rajo Malano !
Maa Bandaro Mudo ?
Pihak kapado panitahan Rajo Malano nan katangah, nan sampai kapado ambo. Ibarat aie lah manampueh ka iliran, kato lah baranang ka pusako, indak bak raso ka diulang kilim ditikam jajak. Diulang kilim kok lapeh, ditikam jajak kok sipi, bak ibarat tampuruang lago anam, pai tigo tingganyo tigo, bilangannyo ka sakitu juo. Bagaipun baitu sakali, kalau kajawab jo barinyo sajo ambo barikan kapado Bandaro Mudo, ka bak mano kolah ?
Rancak bana Rajo Malano !
Maa Bandaro Mudo ?
Sungguehpun jawab jo barinyo sajo ambo barikan kapado Bandaro Mudo, mah dek karano ambo lai taduduek sorang jo baduo, ambo paiyokan pulo gak sapatah kato, mananti Bandaro Mudo sakutiko.
Ambo nantinyo Rajo Malano !
Maa Bandaro Mudo ?
Dagueh dagah bunyi padati Manurun cando pinang awan
Tadi Bandaro Mudo sifat mananti
Ambo sifat mampaiyokan
Setelah ambo paiyo patidokan, atolah nan ka jadi jawab barinyo lah tu kini, aluran carano nan katangah, Insya Allah mudahmudahan iyo lai barisi kalangkapan.
Kalaluannyo bana lah tu kini, alun bakilek lah bakalam, bulan lah sa angkap tigo pulueh, alun dilihek lah saumpamo dimakan, raso lah tibo dalam tubueh, kalaluannyo bana lah tu kini, ujuik mukasuik Bandaro Mudo sajolah mintak dikatangahkan. Lah sampai di Rajo Malano ?
Maa Bandaro Mudo ?
Lah sakuek sakuaso itu, ambo kuasokan sajonyo Bandaro Mudo.
Si Upiek Siti Aminah Duduek marendo ditapi tabek
Dahulu kato baistinah
Kamudian kato basicapek
Mak basicapek sajolah ambo manyampaikan kato nan sapatah kapado Bandaro Mudo. Pihak di kito mamak timba jo baliek, lah dilakukan bicaro bathin lah dilayiekan nan isi hati, kapado niniek dengan mamak, urang nan gadang basa batuah, nan mamegang labuhan adat jo pusako, lah dikaji manuruik syarak, lah dibaco nan manuruik adat, lah tajadi balatak tando, kaciek beti gadang buatan, batampuek lah bulieh di irik, batali lah kuek kabek, lah tasanda ka nan gadang, lah tagantuang ka nan tinggi, ateh indak sanang dihati, indak sunyi di kiro-kiro, pihak di kito mamak timba jo baliek, makok dijalang niniek jo mamak, dilayiekan nan isi hati, disampaikan niek jo mukasuik, handak baralek bakanduri, pihak di niniek dengan mamak, urang nan kayo di baragieh, kito nan suko di mamintak, tiok kandak tiok balaku, tiok pintak tiok bulien. Kok di adat adolah kawi, kok di syarak adolah lazim, lalu lah diukue panjang jo singkek, lah ditimbang barek jo ringan. Baa toh hanyo di nan kini, diateh janji nan dikarang, padan nan diukue, janji dikarang lah samo ditapati, padan diukue lah samo dilalui. Pihak kapado pekerjaan kito nangko, kok nan dimukasuik alah sampai, nan di ama lah pacah, baa toh hanyo di nan kini, supayo karih nak pulang ka saruangnyo, pinang nak pulang ka tampueknyo, sirieh nak pulang ka gagangnyo, ameh nak pulang ka puronyo, tando nak pulang ka nan punyo, kok nan takabek nak samo kito bukak, kok nan tatambang nak samo kito bacuik, nan tapawuik nak samo kito lapehkan, supayo paretongan kito masueknyo ba pambukak, kaluanyo bapangunci.
Cuma itulah nan ka ambo sampaikan kapado Bandaro Mudo.
Lah sampai di Rajo Malano ?
Sakiro-kiro baitu Bandaro Mudo ! Maa Rajo Malano ?
Pendek kato jo parsambahan, sakiro-kiro malalukan kato jo kabanaran, kapendek-annyo bana lah tu kini, singkok daun tariek buah sajo ambo mamulangkan kato nan sapatah kapado Rajo Malano.
Atolah nan manjadi buah panitahan di Rajo Malano lah tu kini, pihak di kito mamak nan timba jo baliek, lah ditimbang barek jo ringan, lah diukue panjang jo singkek, lah dilakukan bicaro bathin, lah dilayiekan nan isi hati kapado sagalo niniek jo mamak, kok nan dimukasuik nan lah sampai, nan di ama ma lah pacah, pihak kapado paretongan kito mamak timba jo baliek, kok nan takabek ka samo kito lapehkan, nan tatambang samo kito bacuik, supayo paretongan kito ko masueknyo ba pambukakak, kaluanyo ba pangunci. Kan itu bana nan manjadi buah panitahan di Rajo Malano.
Sakiro-kiro baitu bana Bandaro Mudo.
Maa Rajo Malano ?
Pihak kapado panitahan Rajo Malano nan katangah, itulah kato sabananyo, ibarat aie lah manampueh ka iliran, kato lah baranang ka pusako. Bagaipun baitu sakali, mah dek karano ambo lai pulo taduduek sorang jo baduo, ambo paiyokan pulo agak sapatah kato, mananti Rajo Malano sakutiko.
Lalu Bandaro Mudo mampaiyokan kapado sagalo biriannyo, setelah dapek kato mufakat, dipulangkan kembali kapado Rajo Malano, sambie mananyokan apo kolah nan tabawo di kaik.
Kemudian Rajo Malano manyampaikan kapado Bandaro Mudo nan tabawo di kaik, adolah adat nan ka tibo, setelah tando dikembalikan kapado mamak timba jo baliek, lalu Rajo Malano mamintakkan sifat kapado sagalo niniek jo mamak.
Sifat pitua nan jatueh dari pado sagalo niniek jo mamak yang akan dipakaikan adalah adat nan ka tibo yaitu bijo ditanam kok nyo tumbueh, supayo sangkutan nak jan sakah, tali nak jan putuih antaro anak pisang jo induek bako. Kok karajo alah ba imbauan, tibo di nan buruek batarambauan. Pihak di anak kamanankan kok tumbueh selang jo salisieh, barubah ka samo manyapo, batuka ka samo ma anjak, hilang samo mancari, tabanam samo manyilami, hanyuik samo mamintasi, tarapuang samo mambinjek. Itulah nan dikatokan "Kapalo Kaik” artinyo pihak di mamak anak daro mangaluakan ameh nan samiang, ataupun diganti jo pitih salapan uang, artinyo cupak tatagak nan diisi, adat takambang nan bapakai.
• Kalau karajo dilaksanakan manuruik adat, nan digantuangkan
ka nan tinggi, disandakan ka nan gadang, harus ditampueh nan manuruik paratuaran adat antaro lain : 1. Mananam laren janang 2. Manduduekkan janang nan duo baleh 3. Manduduekkan bujang juaro
4. Manduduekkan amban puruek ** Dalam panyalasaian alek, ikolah nan dinamokan nan tapawik dibari makan, nan lapeh di ciciri. Catatan : mulai dari * sampai ke ** dapat juga dimasukkan kedalam Tata Tertib.
