Pidato Maanta Nasi

 O. PARSAMBAHAN MA ANTA NASI

Manjalang mintuo karumah mande marapulai, ka mambaco do'a salamat, itulah nan disabuik "Pai Ma Anta Nasi”.

Lalu Bandaro Mudo maminta izin kapado sagalo Niniek Mamak.

Maa Rajo Malano!.

Parsambahan ditibokan kapado Rajo Malano!

Sampaikanlah Bandaro Mudo!.

Sungguehpun kapado Rajo Malano surang nan ta imbau di awal kato nan sapatah, mak sarapek papeknyo lah niniek jo mamak nan sa undang jo undang nan turun temurun, pusako jawek ba jawek, limbago sudah takambang, janjang pusako tanggo adat, sifat handiko harum manih, langgam budiman jo arifin, tampek balinduang cadiek pandai,sandi aman tiang salamat, hukum adil, bungka piawai, undan alur taluek bicaro, lubuek aka rangkingan budi, deta banamo sari mego, baju angkatan parapatieh, serong bapilin jo ikek pinggang, sisik karih tanan tabukan, calak lubuek caro malako, ampang labueh balam ka inggok, pakaian caro Minangkabau, mukin nan ampek pulueh ampek, cadiek pandai malakukan, lagi johari bijaksano, sulueh bendang caramin taruih, palito sidang juma'at, ma ikuk surueh Rasulullah. Pihak kapado parsambahan, indak kan diatok dibilang bana, hanyo jo sambah dimuliakan. Kasudahan parsambahan disampaikan juo kapado Rajo Malano.

Mandaki gunuang sigalibuik Batang kayu banyak nan pantai Sarumpun jo kayu kamat, Takuik ganta lah ambo ka manyabuik gala Pangulu banyak nan sati Tuanku banyak nan kiramat Orang tuo nan gadang basa batuah Takambang payuang tiang tujueh

Kiriman anak rajo ambun Kapado tuanku Syair Alam Tulis nan dari tanah Makkah Cetak nan dari Bandur Donsak Buatan romen anak Cino Mandanga tuanku naiek nobat Dalam takhta kerajaan Tando angkatan kabasaran Payuang ameh batatah intan Tangkai bapaluik jo mandikan Banamo payuang rono ali Bercampur dengan suto putien Batorai dengan mutiara. Manjadi angkatan kabasaran.

Artinyo disusun jari nan sapulueh, ditakuekan kapalo nan satu, barmuhun mamintak ampun, sarato limpah kamurahan kapado pangulu yang amat molie, iyolah niniek dengan mamak, sarato tolan sudaro ambo, nan adil lagi adalah, jikok ado khilaf khilafat, di ateh malelokan nan manuruik adat, iyolah mintak dimaafkan, karano ambo urang ketek mudo matah, aka kurang pandapek balun,manggigie badan dibawo tagak, raso kalu lidah manyabuik, bana tak bulieh diilakkan.

Pihak kapado parsambahan indak kan diatok dibilang bana, hanyo jo sambah dimuliakan. Kasudahan parsambahan ditibokan juo kapado Rajo Malano.

Atolah nan banamo diparsambahkan kapado Rajo Malano lah tu kini, diateh janji nan dikarang, padan ran diukue, janji dikarang ditapati, padan diukue dilalui, pusako banyak pusako, pusako ba ateh tumbueh, dihari nan sahari kapatang, makok datanglah Rajo Malano dari Korong Caniago ka Korong Bendang nangko, ma antakan marapulai pulang ka rumahnyo. Pulangnyo bukan pulang sajo, pulang dianta mande bapak, sarato jo niniek dengan mamak, langkok jo anak mudo-mudo sarato inang pangasuehnyo.

Baa toh hanyo di nan kini, di hari nan sahari kini, hari baiek kutiko elok, angin tanang ombak salasai, disinan parahu dilayiekan, hari kagadangan di niniek dengan mamak, kabasaran di anak daro marapulai, katandonyo kacimpuang kapamenan mandi, rasian ka pamenan lalok, jikok dikilang, kilang disadok, disadok ka niro juo. Jikok dibilang, dibilang diatok, ujuiknyo kasitu juo. Dihari nan sahari kini, datanglah pulo kami dari Korong Bendang ka Korong Caniago nangko, langkok jo niniek dengan mamak, sarato andan pasumandan, sarato anak daro jo marapulai, pai manjalang rumah dang mandenyo, ka mambaco doa selamat ka namonyo, mangkok malangkah babungo batih, malenggang babungo tangan, ka sawah babungo ampiang, ka rimbo babungo rotan, batang silado diladokan, batang sijarak dalam padi. Barang nan ado ka kito adokan, barang nan tidak kama ka kito cari.

Tando alamat putih hati, tando alamat muko janieh, makok kami bawokan juolah sirieh dicarano, nasi kunik nan sacogok, sarato juadah nan barang sado ado, saiyo nak mintak ditarimo jo hati nan suci, jo muko nan janieh, di Rajo Malano diateh selang nan bapangka, karajo nan bapokok.

Cuma itulah nan ka ambo sampaikan kapado Rajo Malano.

(Jawaban Rajo Malano) : Lah sampai di Bandaro Mudo ? Sakiro-kiro baitu Rajo Malano !

Maa Bandaro Mudo!

Sairiang balam jo barabah Balam tabang barabah mandi Saikue tagulampai di sumayan

Sairiang salam dengan sambah Salam datang sambah kumbali

Parsambahan dikumbalikan kapado Bandaro Mudo

Ampun baribu kali ampun, ampunlah ambo di urang kayokayo, sarato urang molie-molie, manti pegawai, sidang palito, guru jo labai imam dan khatib, malin maulana, pandeka, adiek kakak, tuo mudo, hulubalang, pangulu nan gadang basa batuah, indak diatok dibilang gala, sambah takzim manjalani, pihak di badan diri ambo, sambah manyambah kuranglah tahu, bakato-kato kuranglah pasien, dipatitih kurang ilmu, berfasiat lidah tajerek bana, nan bak pitua hadis malayu :

Pandai mancolok bangkahulu Kurang sajarum pakodian

Pandai ma atok urang dahulu

Kurang manyusun urang kudian

Mako ambo tagak manyambah, mangikuik surueh dengan tagah, takuiklah ambo ka manggeleang, saganlah ambo ka mambantah, karano nan sifat di nan mudo, bacapek kaki, baringan tangan, lah taratur tarjun malah ambo, manyambahkan sambah. Sambah tibo kapado pangulu nan gadang basa batuah, salam kumbali kapado tuanku yang alim lagi kiramat.

Pihak kapado parsambahan, indak kan diatok dibilang bana, kasudahan parsambahan dipulangkan juo kapado Bandaro Mudo. Pado kito basamo ! (jawab Bandaro Mudo)

Pihak kapado parsambahan Bandaro Mudo nan katangah, nan tairiang nan tabantang, nan tatabue katangah-tangah, nan sampai kapado ambo, jikok di dangan bunyi baritonyo, dipandang alah baiek rupo, didangapun alah baiek bunyi, lah bunta bak sawah nan sapiriang, lah boneh bak padi nan satangkai, indak bak raso ka didulang, didulang ameh dipalangki, sa ameh tingga ditintingan. Indak bak raso ka diulang, diulang juolah kato nan tadi, nak jaleh kato nan kudian. Atolah nan manjadi parsambahan di Bandaro Mudo lah tu kini, dihari nan sahari kini, hari baiek kutiko elok, angin tanang ombak salasai, disinan parahu dilayiekan, hari kagadangan di niniek dengan mamak, kabasaran di anak daro jo marapulai, tando kacimpuang ka pamenan mandi, rasian ka pamenan lalok, kok dikilang, kilang disadok, disadok ka niro juo. Jikok dibilang, bilang diatok, ujuiknyo kasitu juo. Dihari nan sahari kini, makok datang pulolah Bandaro Mudo dari Korong Bendang ka Korong Caniago nangko, langkok jo niniek dengan mamak, sarato andan pasumandan, sarato anak daro jo marapulai, pai manjalang rumah dang mandenyo, ka mambaco doa selamat ka namonyo, makok malangkah babungo batih, malenggang babungo tangan, kasawah babungo ampiang, ka rimbo babungo rotan, batang silado diladokan, batang sijarak dalam padi. Barang nan ado diadokan, barang nan tidak kama ka dicari. Tando salamat putieh hati,, tando alamat muko janieh, mako babawokan juolah sirieh di carano, nasi kunik nan sacogok, sarato juadah nan barang sado ado, saiyo nak mintak ditarimo jo hati nan suci, jo muko nan janieh dikami diateh namo selang nan bapangka karajo nan bapokok, kan baitu bana nan manjadi buah parsambahan di Rajo Malano ! Sakiro kiro baitu bana Bandaro Mudo !

Jikok sapanjang panitahan Bandaro Mudo nan katangah, lah didalam adat dalam pusako, lah taracak diundang, lah tasangkuik di limbago, lah digalanggang sidik jo bana, lah didalam mungkin jo patuik, lah tatampuah di jalannyo, lah taturieh di ruangnyo.

Bagaipun baitu sakali, mah dek karano kami diateh namo selang nan bapangka, karajo nan bapokok, lai pulo tagak bapusu, duduek baropok, supayo nak dapek nan kajadi jawab jo barinyo, ambo paiyokan pulo agak sapatah kato.

Setelah bulek aie ka pambulueh, bulek kato ka mufakat, mako ditarimolah kadatangan Bandaro Mudo jo niniek dengan mamak sarato anak daro jo marapulai sarato jo pambawaannyo.