Pidato Pasambahan Makan Jo Minum
V. PIDATO MINUM MAKAN
Pidato minum makan adalah pidato persembahan dalam acara minum makan sesuai tata tertib menurut adat.
Disampaikan oleh salah seorang sipangka atau bujang juaro, disampaikan kapado alek nan datang, dalam hal ini disampaikan oleh Sutan Marajo.
1. Khotbah Pidato :
Salam takzim dari ambo nan terhadap kapado Sutan perhubungan silaturrahim, ambo iringi dengan sambah sujud ka wajah yang amat molie, pangulu yang amat basa, urang tuo nan gadang basa batuah, nan duduek di janjang tanggo adat, kiramat sabab di sifat sidiek tabalie jo amanah, bijaksano samparono paham, biopari samparono hukum, nan mamacik hukum nan duo, hukum syarak batulan kitab, hukum adat batulan tambo. Hukum syarak syariat molie, nan turun daripado Allah, ditarimo daripado Nabi. Wajib, sunat, halal, haram, sah, batal dengan mukarueh, lagi mambawo kaba suko, sarato mambari patunjuek.
2. Isi pidato minum makan :
Awal dahulu kato bana, asal dahulu tampek tumbueh, tumbueh sarupo nan bak nangko, adat niek dikanduang syarak, ikara dilingkuang adat, nan bak undang andai jo bido, nan bak kato hadis malayu :
Anak cacak di dalam padi Urang manggaro tangah sawah Tabanglah buruang marapati
Aso kacak kaduo jadi Tigo saukue ampek sudah Kini takadie ditapati
Pusako dirantang panjang, dipaluangkan bumi jo langik, ditagakkan rumah jo tanggo, sawah ladang banda buatan, langkok jo adat limbagonyo, sarato pitatah patitihnyo.
Si Senter babaju tabang Si Tanti babaju tigo
Nan dinadar nan lah datang Nan dinanti nan lah tibo
Alah tarupo niniek jo mamak, lah taduduek angku-angku nan bakarapatan sarato kito nan basamo. Kok duduek lah bak raso lamo, makok taniek pulo malah di kami di ateh selang nan bapangka jumlah karajo nan bapokok, nak baragieh aje nan saraguek sarato hedangan nan ala kadarnyo, nan disanduek andam pasumandan, nan diangkek bujang palakek, nan capek kaki nan ringan tangan, capek kakinyo tak panaruang, ringan tangannyo tak pamacah, dari pangka lah lalu ka ujuang, lah tasusun di ruang tapi, lah tahedar di ruang tangah, lah talatak diharibaan kito nan basamo.
Jikok dipiriang jo cangkienyo, kok diagak rasolah cukuik, kok dietong rasolah sampai, kurang-kurang ka ditukuek, senteangsenteang ka dibilai, tago janang lai tagak juo. Baa to hanyo di nan kini, haluran hidangan nan ka tangah nan talatak diharibaan kito nan basamo.
Anak urang Silayo tanun Singgah sabanta tangah pakan Mambali kain tanunan Padang
Aie dicangkie mintak diminum Hidangan dipiriang mintak dimakan Nak sanang hati si rajo janang
Itulah nan diparsambahkan kapado Pandeka Sutan.
Lah sampai di Sutan Marajo ?
Sakiro-kiro baitu, Pandeka Sutan!
Maa Sutan Marajo!
Lalukanlah Pandeka Sutan!
Mangkonyo kato ka dijawab, samo diucap malah Allah,samo dikekuik malah Nabi, Nabi Muhammad SAW, waris nan indak bulien hilang, dipakai juo salamonyo. Sajaknyo sumue ka dikali, mulonyo rantiang ka disakah, layang malayang sambah tibo, timpo batimpo salam datang, duduek basamo jo nan banyak, rundingan tapacik di nan basamo, kato tapegang di nan tuo, nan tagueh bakeh bagantuang iyolah pangulu dalam nagari.
Pihak kapado parsambahan indak ka atok dibilang gala, hanyo jo sambah dimuliakan, parsambahan dikumbalikan kapado Sutan Marajo.
Pihak kapado parsambahan Sutan Marajo nan talancang ka muko rapek nan tatabue ka tangah-tangah, nan sampai di badan diri ambo kok didanga bunyi baritonyo, didanga alah baiek buni, dipandang alah baiek rupo, lah bunta bak sawah nan sapiriang, lah bonen bak padi nan satangkai.
Pihak di badan diri ambo:
Indak bak raso ka didulang Pandulang ameh dipalangki Saameh tingga di tintingan
Indak bak raso ka diulang Diulang juolah kato nan tadi
Nak jaleh kato nan kudian Apotolah nan manjadi buah panitahan di Sutan Marajo tadi :
Si Senter babaju tabang Si Tanti babaju tigo
Nan di nadar lah datang
Nan di nanti nan lah tibo
Dek karano alah tataduek niniek jo mamak, sarato kaum karapatan makok taniek pulo malah diselang nan bapangka, jumlah
Lah sampai di Pandeka Sutan ?
Sakiro baitu baru Sutan Marajo! Maa Pandeka Sutan ?
Sungguehpun lah sampai di Pandeka Sutan, kok putien kapeh dapek dilihek, putieh hati ba kadaan, iyo bacalieknyo tando tarimonyo, Pandeka Sutan.
Maa Sutan Marajo!
Sampaikanlah Pandeka Sutan !
Anak urang di Bangkahulu Nak lalu ka Pulaupunjuang
Pamulailah di Sutan Marajo di pangka dahulu Nak rancak rabahnyo sampai ka ujuang
Jawab Sutan Marajo:
Pisang kalek tumbueh di hulu Pisang manih tumbueh di hutan
Biaso alek minum dahulu Kudian saketek sipangkalan
Jawab Pandeka Sutan :
Pisang kalek tumbueh di hulu Pisang manih tumbueh di hutan
Batue alek minum dahulu Tapi alek nak samo jo sipangkalan
Jawab Sutan Marajo :
Si Titah nak rang di Pulaupunjuang Mati di padang saridamo
Kok titah ka samo kito junjuang Rasaki ka samo kito tarimo
Jo Bismillah sajo kito tarimo la: Pandeka Sutan.
Lalu dilaksanakanlah minum makan.