maurak paleh-paleh mangirok ujuang daun
S. MAURAK PALEH-PALEH MANGIROK
UJUANG DAUN
Maurak paleh-paleh mangirok ujuang daun maksudnya adalah menyelesaikan alek tandonyo masuek bapangunci, kaluanyo bapambukak.
Untuk ini salah seorang mamak menyuruh urang sumando maimbau orang-orang yang terkait didalam penyelenggaraan alek antara lain :
1. Seluruh birian mamak 2. Orang sumando nan sabirian 3. Bapak padang sarikek (induek bako) 4. Anak pisang (kampuang bungsu) 5. Andan pasumandan 6. Lareh janang 7. Janang duo baleh 8. Bujang juaro
Tujuan maimbau orang-orang tersebut diatas adalah sebagai berikut:
1). Membicarakan silik gawa kalau ado dalam pelaksanaan alek.
Seandainyo ado makok diselesaikan seperti sumbiang ka dititik, hilang ka diganti, nan kumueh ka dibarasiehkan, salang ka
dipulangkan. 2). Yang menyangkut dengan lareh janang dan janang duo baleh,
diselesaikan dengan, nan tapawik dibari makan, nan lapeh diciciri, termasuek urang-urang nan basusah payah seperti
tukang cuci piriang, tukang tanak, amban puruek. 3). Sipangka sarato jo mamak minta maaf dan tarimo kasih, kok ado
nan talantuang di kanaiek, tagisie di katurun, nan taupek nan tapuji salamo penyelenggaraan alek dek karano suri nan ka ditanun, gunjai nan ka diuleh untuek padoman dalam
pelaksanaan dimaso nan akan datang kapado seluruh penyelenggara yang terkait dalam terlaksananya alek.
Parsambahan dari mamak kapado urang sumando.
Maa Malin Sati ?
Sampaikanlah Gindo Kayo !
Pendek kato jo parsambahan, sakiro-kiro malalukan kato jo kabanaran, kependekannyo bana lah tu kini, singkok daun tariek buah sajo ambo manyampaikan kato nan sapatah kapado Gindo Kayo. Sungguehpun kapado Gindo Kayo sorang tampek ambo manyampaikan kato nan sapatah, dilayienyo, dibathinnyo iyolah kapado Gindo kayo nan babirian, sarato nan basamo ataupun alek nan hadir diateh rumah nan baiek nangko.
Atolah kato nan sapatah nan ka ambo sampaikan lah tu kini, mah dek karano pekerjaan kito ko alah ba awa ba akhir, bajalan lah sampai ka bateh, balayie lah sampai ka pulau, kok hujan alah tadueh, kok kabuik alah tarang. Nan manjadi pertanyaan di kami sagalo mamak lah tu kini kapado sagalo urang sumando, pihak kapado pekerjaan ko, sakironyo lai indak ado cacek binaso sarato silik jo gawa, kok ibarat bajalan lai kok lojue sajo.
Limbak nan dari pado itu, kok ado barang urang nan basalang, lai kok indak ado sumbiang nan ka di dititik, hilang nan ka diganti.
Cuma itulah nan jadi pertanyaan dari kami sagalo mamak kapado sagalo urang sumando.
Lah sampai di mak Malin Sati?
Sakiro-kiro baitu Gindo kayo.
Maa mak Malin Sati?
Pihak kapado panitahan mak Malin Sati nan ka tangah, kok di ambo panjang indak bak raso ka ambo karek, pendek indak bak raso ka ambo uleh, kalaluannyo bana lah tu kini, ibarat aie lan manampueh ka iliran, kato lah baranang ka pusako, bagaipun baitu
sakali, supayo nak dapek nan kajawab jo barinyo, mah dek karano kami diateh namo urang sumando lai pulo taduduek surang jo baduo, ambo paiyokan pulo agak sapatah kato, mananti mak Malin Sati sakutiko.
Ka ambo nantinyo Gindo Kayo.
Setelah dibulekkan aie ka pambulueh, kato ka mufakat, mako dipulangkan kembali kapado mak Malin Sati.
Maa mak Malin Sati ?
Sampaikanlah Gindo kayo!
Dilipek-lipek batang padi Dilipek lalu patah sambilan Tadi mak Malin Sati sifat mananti Ambo sifat mampaiyokan
Setelah ambo paiyo patidokan, atolah nan ka jadi jawab jo barinyo di ambo lah tu kini, pihak kapado partanyaan sagalo mamak, rupo-ruponyo lai indak ado silik jo gawa, ataupun cacek binaso, sumbiang nan ka dititik, hilang nan ka diganti, ibarat bajalan mah lai lojue sajo. Cuma itulah nan ambo sampaikan kapado mak Malin Sati.
Lah sampai di Gindo Kayo ?
Sakiro-kiro baitu mak Malin Sati !
Sungguehpun lah sampai di Gindo kayo, rupo-ruponyo lai indak ado silik jo gawa, cacek binaso, ataupun sumbiang nan ka dititik, hilang nan ka diganti, iyo syukur kito ka nan satu, mintak tarimo kasih ka nan banyak. Kok nan tapawik iyo baagieh makan, kok nan lapeh iyo baciciri, kapado urang nan bajarieh bapayah atau nan melaksanakan alek, supayo dilaksanakan oleh urang sumando atau sipangka.
Catatan :
Pelaksanaan hal tersebut diatas tiga hari sesudah alek selesai.