parsambahan mambaka kumayan
R. PARSAMBAHAN MAMBAKA KUMAYAN
Parsambahan dari Rajo Malano kapado Bandaro Mudo.
Dari sahari ka sahari, kambanglah rakyat di nagari, malato kambang basusun, tumbueh di jorong kampuang alam, di ranah adat jo pusako, kok kawue lai barakek, pintak lai bulieh, mangucap syukur dalam hati. Nikmat baiek salamonyo, artinyo bana lah tu kini, pihak di mande jo bapaknyo, urang nan duo balah pihak, dek ujuik inyo mamintak, kok kandak lai balaku, pintak lai ka bulien, lah dapek anak siparampuan, sahari lahie ka dunie, dipasang niek dengan kawue, apolah niek dengan kawue, nan dipasang di mande jo bapaknyo, ka ubek jarieh palarai damam, sidingin tampa di kapalo, manggih ketek lakehlah gadang, rang tanam ditapi tabek. Gadih ketek lakehlah gadang, pananti dagang pulang bansek. Pihak di niniek dengan mamak, pa unyi rumah nan gadang, pananti alek jaueh ampiang, panimbang pacahan di nagari. Alah lah gadang anak nantun, gadang lah bak diamba-amba, tinggi lah bak di anjuang-anjuang, alah ba umue anam tahun masuek ka tujueh hanyo lai. Kok malam inyo mangaji, lah tamat Quran dibaconyo, kok siang disurueh inyo basikola, alah lapeh sikola anam, ditambah pulo pangguruan, pandai ma ukie jo batanun, pandai marendo manirawang diajari inyo barakik, nak pandai badayuang surang, diaja hiduik basakik, nak pandai batenggang surang.
Cimparueh di koto lamo Maningkek jalan ka gunuang
Mande kanduang bakabun bungo Datanglah kumbang ka marengeang
Dek hatta takadie Allah, padi sipuluik panjang ruweh, ambiek sagantang bagi duo. Lah cukuik umue limo baleh, lah datang urang nak basumando, baiyo batido-tido, babincang mande jo bapak, barundiang niniek dengan mamak, makok dilakukan bicaro bathin, lah sampai balatak tando, kaciek tando gadang tando, kaciek beti
gadang buatan, batampuek lah bulieh dijinjiang, batali nak bakuek kabek, lah disandakan kan nan gadang, lah digantuangkan ka nan tinggi.
Ateh pulo indak sanang dihati, indak sunyi di dalam kirokiro,iyo di mande jo bapaknyo, urang nan duo balah pihak, makok mairiang hadis malayu :
Anak urang di Bangkahulu Mambalah rotan ka tapian Tiok dibalah sipi juo
Mulo dihari nan dahulu Siang manjadi angan-angan
Malam manjadi buah mimpi
Lah jatueh kapado mohon, makok dijalanglah niniek dengan mamak, dikabakan niek jo mukasuik, dilayiekan nan isi hati, handak baralek bakanduri, sunat jamuan marapulai, bago iyo sacangkie aie, bago iyo sajamba nasi, walaupun tidak sasadangnyo. Pihak di niniek dengan mamak urang nan kayo dibaragieh, kamanakan nan suko di mamintak, tiok kandak tiok balaku, tiok pintak tiok bulieh, dibincang nan manuruik adat, dikaji nan manuruik syarak, ditimbang dalam pusako, kok di adat adolah kawi, di syarak adolah lazim, lah diukue panjang jo singkek, lah ditimbang barek jo ringan, dijuluek pitua jo pangaja, sarato pitatah jo patitih. Pihak di anak kamanakan, lah bulieh aie nan satitiek, lah bulieh kato nan sapatan, kok satitiek lah balawikkan, sasakah lah barimbokan, alah sa asam sagaramnyo, mairiang hadis malayu :
Si Kadie anak urang Bangkahulu Si Daud anak urang di patani
Lah takadie sajak dahulu
Barang tajanji ditapati
Tapatan janji nan dikarang, tapatan padan nan diukue, aleklah samo dilangsuangkan, dengan tertib majelisnyo, Insya Allah mudahmudahan indak manarueh kakurangan. Kok marapulailah dipulangkan ka rumahnyo, hanyo sabuah pintak kito, pihak kapado
anak daro sarato dengan marapulai, mamintak kito pado Allah, manjunjuang kito pado Nabi, tukuek manukuek alue paham, tambah manambah aka budi, samo baniek ka nan baiek, labieh mancinto ka agamo. Lah kambang bungo si alatin, pucuek diganti anak urang barat. Sakato lahie jo bathin, satali dunie jo akhirat.
Atai si bungo atai Pucuek digatie si barabah Nan dimukasuik nan alah sampai
Nai di ama nan alah pacah Pakaian di kito mudo mato,
Anak urang di Padang Panjang Ka pasa lalu ka pitalah Niek jo kawue alah ambo pasang Iyolah baliau angku Bandaro Mudo
Nan ka manjawab jo Fatihah Cuma itulah nan ka ambo sampaikan ka Bandaro Mudo. Lah sampai di Rajo Malano ? Sakiro-kiro baitu Bandaro Mudo !
Sungguehpun lah sampai di Rajo Malano lah tu kini, tumbueh di nan sawajah iko kini, kalau bakawue ka tampek kiramat, kalau mamintak ka tampek nan ka bulieh, iyolah angku Malin Sampono nan ka mambacokan ayat jo Fatihah.
Rancak bana Bandaro Mudo !
Samo sapamintak-an kito numah Bandaro Mudo.