Pasambahan Ka Pulang

 M. PARSAMBAHAN KA PULANG

Sungguehpun ka Bandaro Mudo sorang tampek ambo mawalikan buah parsambahan, mak bakarapatan lah Bandaro Mudo di ateh selang nan bapangka, nan ba kakak nan baradiek, nan baipa nan babisan, nan baurang, urang sumando, langkok jo bujang juaronyo sarato karangan jo buatan, sadok nan malatak nan mananai, pekerjaan nangko, alek dipanggie alah datang, anak jo bapak alah batamu, ipa jo bisan alah pun cukuik. Alek lah samo dilangsuangkan dengan tertib majelisnyo, Insya Allah mudahmudahan indak manarueh kakurangan, jikok kapado satantangan duduek, luak tidak lambangpun tidak, dudueklah taranja ka pusako. Juaro nan arif bijaksano, biopari samaian pantan, pandai ma agak jo ma agieh, pandai ma ukue jo manjangko, pandai mangarek jo manguduang.

Dulang paha patah Sembilan Nan ketek pabucuek rabuang Dalamak bamacam ragi Cangkie baragi bungo inai Cerek nan bagai bungo ameh Galuek, sarupo aso-aso Pinggan banamo pinggan pasu Buatan cati bilang pandai Pusako urang dahulunyo Kini nan tidak urang manjua.

Pihak kapado sipangkalan diturunkan jamue dirangkiangan,sahari jamue lah masiek, manumbuek anak mudomudo, alunyo daliek limau manih, lasuang limpato jalang sudah, ayam pangakeh jolong turun, urang manumbuek jolong gadang. Tumbuek nan bunyi pagan jatueh, tampi nan bunyi urang ma imbau, aie ilie tak anti-anti, buruang tabang tatagun-tagun, urang manumbuek elok baso, bareh nan putieh bagai kasah, sabuah tidak rang nan patah. Pihak kapado urang batanak, urang batanak bijo ari, secerek aie lah sadang, sakarek kåyu indak habih. Amal ibadat batambah-tambah. Pihak kapado anak daro jo marapulai, mamintak kito pada Allah, manjunjuang kito pado Nabi, tukuek manukuek alue paham, tambah manambah aka budi, samo baniek ka nan baiek, labieh mancinto ka agamo :

Lah kambang bungo si alatin Pucuek digatie nak rang barat

Sapaham lah inyo lahie jo bathin

Satali dunie jo akhirat Atai si bungo atai Pucuek digatie si barabah

Nan dimukasuik nan alah sampai

Nan di ama nan alah pacah Makok mairiang hadis malayu : Anak urang pasa batipueh Nak lalu ka galo-galo Naiek banda turun pamatang

Angku malin nak maurak simpuen Angku datuek nak maurak selo

Kami si alek nak manuruik di balakang

Tagak nak mauraikan langkah, pulang ka rumah masingmasing, saiyo nak mintak dilapeh di hati nan suci, muko nan janieh, di ateh silang nan bapangka, di ateh karajo nan bapokok.

Cuma itulah nan ka ambo sampaikan kapado Bandaro Mudo jo parsambahan.